His Holyness Dr.M. V. SHEMBE (uThingolwenkosazana)

Info

Shembe, Mbusi Vimbeni-uThingolwenkosazana (+27 April 1933-28 March 2011):- the successor of the Lord Amos Khula Shembe .He assumed leadership of the church in 1995.In His leadership He made the church to be the largest church in the African continent.

 UThingolwenkosazane

Emva kokuba sekukhothame uBaba iNyanga yezulu,kwafika uGandaganda Ngcobo owamnini sitolo emaQadini ngenzani nje kwaseBuhleni.Wafika ngosuku(08/10/95) okwakufihlwa  ngalo uBaba iNyanga yezulu eGetsemane.Wafike wacela ukuthi efunde incwadi eyashiywa kuye iNkosi iNyanga yezulu.Lencwadi yayichaza kabanzi ngozosala ehole ibandla lamaNazaretha njengoba iNyanga yezulu yabe isikhotheme.Kule ncwadi kwabe kulotshwe ukuthi ukhethiweyo ezulwini uyobanakala ngokuduma kwezulu nothingolwenkosazana ekhanda lakhe,wabe  esesho nokusho ukuthi lowo okhethiwe nguBaba uM.V Shembe.Ngempela-ke mhla ziyi-9 ku-October 1995 igama lamenyezelwa ngokusemthethweni  ebandleni,lapha ezansi phambi kwetshe likaBabamkhulu.Ngalo lolo suku washaya umbani wezulu ,lwavela nothingolwenkosazana.Kwaba izinto ziphelele.Igama elithi uThingolwenkosazana lusukela lapho.Nezimanga zakhe zaqala khona lapho iNkosi isigqoke isibhinki ,ngoba khona egcekeni ngalo lelo langa kwezwakala ukuthi sekukhona impumputhe esivuleke amehlo,ihlala ngakho kodwa iNkosi uThingolwenkosizana esihlalweni.Waqala wasebenza uMessiah owabonwa yiLanga,wasebenza uMphrofethi owayebonwe nguBabamkhulu ukuthi uyovela okhalweni lwentombi yakwaMagwaza.

. Izibongo zeNkosi yamaNazaretha yesine
UTHINGO LWENKOSAZANA
(NgokweMbongi uVusi Mthiyane)

UThingo lweNkosazane
Uhlabe wawulawul’​ uNgcobo
Umkhosi waseZulwini
Ugandagand’​ ongenasitelinge
Uyamemez’​ eBuhleni bamaNazaretha


Uthi nay’​ incwad’​ ebhalwe
YiNkosi iNyanga YeZulu
Bayabuza bath’​ uvelaphi
Hhayi impendulo,
Uvela kuMdal’​ eZulwini
Uthunyelwe yiNkos’​
INyanga YeZulu
Uzobek’​ induk’​ ebandla
EBuhleni bamaNazaretha

Incwad’​ enhl’​ ebhalwe
Ngu J J Vaza kubeFundisi
Ume phezu kwetafula wayifunda
Wath’​ iNkosi yehl’​ eZulwini
Yazoba ngumunt’​ ebantwini
Nofike nokukhuluma ebhal’​ ephepheni
Akubang’​ esalalelwa muntu
Nani bafundi bephepha
Ningamth​int’​ owasemaZulwini
Kuyothi uma nimthintile
Kuyohlom’​ ujamengweni
Kuhlom’​ iziNgelosi zeZulu

Nakhu la ngimthanda khona
OkaNhliziy’​ ezingamas​humishumi​
Uvus’​ emidal’​ imizi
Ehamb’​oyise noyisemkhulu
Sizwe umkhosi sahloma
Say’​ eJudiya
Sezwa umkhosi savuma
Wasabela say’​ eNhlangakazi

Uphaphe lwensingizi
Umabik’​ izul’​ ukuduma
Alidumi liyahalalisa
EBuhleni bamaNazaretha
Lihalali​sel’​ uMoy’​ oyiNgcwele
Ofikil’​ emhlabeni kubantu

Insingiz’​ emajuban’​ amabili
Elinye liy’​ eSwazini
Phansi le kaNgwane
Elakhishwa kwa Israeli
Kwabamhlophe abeLungu
Abandlebe zikhany’​ ilanga

Mkhuzi wodlame ngeyingabe
Zoyifikela qathatha
Khon’​ eThekwin’​ eKings Park
Bambon’​ esengaphakath’​ eStadium
Kwaqubuka nezibhidi
Umhloph’​ ondlebe zikhany’​ ilanga


Wath’​ abant’​ abathethelelane
Thethelela mthetheleli
Bekade bekumise
Ngamlenze munye
Um’​ etilongweni kade bekuvalela
Ubani owayengabopha
Izinkanyezi zezulu
Umhlab’​ ukangaka

Uyindida​ndidan’​
Uyabadid’​ abasemhlabeni
Abakwaz’​ ukubon’​ owaseZulwini
Uma efika evel’​ eZulwini
Uz’​ ubathethelele Baba
Sandl’​ esembeth’​ iZulu nomhlaba
Uwe wedw’​ owehl’​ emaZulwini
Wazoba ngumuntu ebantwini
Lwagaba galela
Ukhoz’​ olumaphik’​ olwaseNtabazwe

Ingqungq​ul’​
Eshay’​ amaphiko
Phezu komuz’​ oyiNgcwele
Intab’​ iNhlangakazi
Ntab’​ ezikude zingumasithela
Ukube kazisitheli
Ngabe sixhawul’​ intab’​ iNhlangakazi
Sibonge kuBabamkhulu
UBhombel’​ isitimela samaMpondo
Sibong’​ uMoy’​ oyiNgcwele
KaMenzi weZulu nomhlaba
Awushiyile emhlabeni kubantu

Umlil’​ ubaswe iNkos’​ iNyanga YeZulu
Wathi sesiyahamba thina boShembe
Soshintsh’​ ibhantsh’​ elish’​ ekhay’​ eZulwini
Kuyokuth’​ okhethiwey’​ ekhay’​ eZulwini
Okhethwe uNkulunkulu nedlozi
Umbani wokuthokoza
Ohamba noThingo LweNkosazane
Uyokwehla phezu kwekhanda lakhe
Yilo-ke eliyokumlandela
LukaBhom​bel’​ isitimela samaMpondo

WeLanga lokukhanya
ILanga lama Afrika
Wavuth’​ umlilo zash’​
Izikhov’​ ezihlal’​ eNanda
Kwabasha neziseSikhawini ngal’​ eMpangeni
Mgili wezimanga nezimangaliso
Mduduzi wabadabukileyo
Wabanhliziyo zinosizi


Bayakusho bath’​ unguMsindisi
INkosi yaseNazaretha
Ufakazwe yiziNgelosi zeZulu
Zathi uNgcwele ngcwele
Kwabavel’​ eZulwini
Wafakazelwa umhlaba neZulu
Zathi uNgcwele ngcwele
Kwabavel’​ eZulwini

Ubusisiwe wena wedwa
Esandleni sikaBhombel’​ isitimela samaMpondo
Wabusisw’​ emkhathini weZulu
Wabusiswa nasekujuleni kolwandle
Namhl’​ uthabath’​ unyawo
Ulubeka phezu komhlaba
Wath’​ umhlab’​ uNgcwele ngcwele
Kwabavel’​ eZulwini

Inteth’​ owayitheth’​ emin’​ Ekuthuthukeni
Ilethwe uMfundis’​ uZ A Khanyi
Wathi Alberton Thokoza Thembisa
And Zone 7
Bonke ngomthandazo eKuthuthukeni
Ngal’​ igamakazi loThixo baseNazaretha
Gijimani ngezindlela zonke
Niyobikel’​ abangakezwa
Nibikel’​ abaMhloph’​ abeLungu
Abandlebe zikhany’​ ilanga
Nith’​ ufikil’​ olandelwa yizizwe zonke
Ifikil’​ iNkos’​ uMesiya

Simbone ngemisebenzi yabavel’​ eZulwini
Abazishosha bayasukuma
Asale phans’​ ama wheel chair
Ngal’​ igamakazi loThixo baseNazaretha
Sihawu hawu semihla ngemihla
Bayakuba​baz’​ abasezweni
Bath’​ abakwaz’​ embhalweni
Abafundang’​ encwadini yeSambulo
19 verse 12 up to 16

Zonke izizwe ziyakumkhonza.